']]}
"ذاكرت وقلت أنا مش نافع.. وشجّعت في نفسي بكل دافع، حفظت اللي مكانش شافع.. واتكعبلت في كل الموانع، سلاحنا كان برشامنا.. والمراقب واقف قدامنا، من زمان بنستنى.. بندور مش لاقيين نجاحناااا.. في كل لجنة في بلادي.. كلمة هدبلر بتنادي" تلك كانت افتتاحية صفحة أنشأها مجموعة من الشباب على موقع التواصل الاجتماعي "فيسبوك".
تدعوا صفحة "الامتحانات على الأبواب .. وانا لسه مفتحتش كتاب" اللي مش مذاكر كويس.. أوكان الامتحان صعب عليه.. أوكان المراقب رخم وواقف جنبه طول الامتحان.. أوكان جنبه واحد زنان.. يدخل على "فيسبوك".. لأن خلاص الامتحانات على الأبواب.. وانت لسة مفتحتش كتاب.. وأكيد هيكون إحساسك وانت بتذاكر مادة مش بتحبها بس بتذاكرها عشان هتمتحن فيها.. هو نفس إحساسك وانت قاعد مع أخوك الصغير وهو مشغل قناة (سبيس تون) بيتفرج على فيلم كارتون، وكل ما تقرّب منه عشان تقلب القناة يعيط.
وفي حب ورقة الامتحان قال محمد الكيلاني "عندما رأيت ورقة الامتحان.. أعجبت بها - وفرحت كثيرًا.. ونظرت للمراقب بتأمل شديد قائلا.. هو النجاح من كام يا باشمهندس؟".
ولأن شعارالطلاب في هذا الوقت الراهن.. "الطلاب والمراقبين إيد واحدة"، ففي ظروف غامضة وغير معروفة حتى الآن صدر قرار من وزارة التربية والتعليم بإلغاء امتحانات الثانوية العامة هذا العام فى جميع محافظات مصر.. وأعلنت أيضا بتأجيل الامتحانات عن الجامعات.. وسيتم الإعلان خلال ساعات عن الخبر.
استخرج من الفقرة:
"مبتدأ - خبر - نعت شبه جملة - جمع مذكر سالم - جار ومجرور - جملة فى محل نصب".
ووجّه مسئول الصفحة، سؤال لكل الدحيحة: ينفع تذاكر طول السنة عشان تجاوب في الآخر على امتحان ساعتين بس؟.. طيب دي لازم تكون دعوة كل من لم يذاكر حتى الآن.. (اللهمّ ابعد عنّا القلم الأحمر والمراقب الرخم)، ودي كلمة من الطالب الغلبان للوحش إللي بيحط الامتحان: "انت قلبك قاسي أوي أوي.. إنت مش بتحس كدة وكدة".
فيما رصد مسئول الصفحة حوارًا بين طالبين خلال الامتحان وقال:
أحمد: ميدو .... ميدو .... بسسسسسسسس
ميدو : عايز إيه مش وقتك خالص ...؟؟؟؟
أحمد : إجابة السؤال الرابع
ميدو : حراااااام ؟؟
أحمد: هو إيه اللي حرام .. ياد خلّص ؟؟
ميدو: حرااااااااااااااااااااااام
أحمد: يا إبن ...... أنا مش لسة مغششك امبارح!! إنجز
ميدو: حراااااااااااااااااااااااااااااااااااااااااام
أحمد: حرام حرام
بعدها بربع ساعة
أحمد: ميدو
ميدو: ؟؟؟؟؟؟؟؟؟؟؟
أحمد: السؤال السادس
ميدو: من غشّنا فليس منا
أحمد: لا والله ؟؟؟؟؟
أحمد: ياااااااااد إنجز.. أما انت صحيح....
ميدو: من غشششششششششششنا فليس منّا
أحمد: وحياتك لاوريك بس اما نطلع
ميدو : من غشّنا فليس منا
بعد انتهاء الامتحان
أحمد: تعالى هنا يلا
ميدو: إنت ياد!! بقالي ساعة عمال اغشش فيك وانت ولا انت هنا
أحمد: إحنا هنستهبل يا أخويا؟
ميدو: السؤال الرابع اذكر الحكم الشرعي.. الجواب بتاعه حرام
ميدو: والسؤال السادس بتاع الأدلة.. كان الدليل: (من غشّنا فليس منا)
ميدو: انت نسيت إن ده امتحان دين.
وقالت زهراء محمد: عزيزتي الدراسة.. مهما مر الزمن وطالت الأيام.. علاقتي معاك سوف تبقى حبا من طرف واحد، وده لأن دايما في وقت الامتحانات، يتحوّل الجدار إلى منظر طبيعي جميل.
ومن هنا دعا سمير على إلى تعديل منهج أولى ابتدائى.. ليكون "بدل قصيدة قطتى جميلة واسمها نميرة" النص الجديد :.........مزّتى خطيرة..اسمها سميرة..جسمها جميل......شعرها طويل.. رغيها مسلي.. وهى لى كظلّى.. خلّتنى بمهارة.. أسيب حبيبتى يارة.
وقالت أسماء العطّار "إزاى تحب المذاكرة زى ما بتحب الفيس بوك؟، إعمل لمخّك Refresh، السؤال اللي يعجبك إعمل له Like، السؤال اللى مايعجبكش إعمل له Block، السؤال اللي تعرفه إعمل عليه Comment، وإذا عجبك المراقب إعمل معاه Chatt،وإذا كان اللي جنبك مش عارف حاجة وخلّصت امتحانك قبله حاول تعمل post on his Post، بس ربنا يستر وما يكونش المراقب صاحي ويعملك report.
وقال حسام بسيوني، أما تكون بتذاكر، وتذاكر، وتذاكر، وتذاكر.. وخلاااااص جبت أخرك وقفلت المنهج.... وأول ما تقعد على الكمبيوتر تعدّى أمك وتقول لك.. الله الله على المذاكرة إبقى تعالى قابلنى إن نفعت، وتزعل وتحلف ما انت مذاكر.. أما لو رحت اللجنة ومعرفتش تحل كويس لازم هتقول" كان لازم أذاكر من الأول ومكنتش ضيّعت الوقت.. والله بجد أنا بستهبل.. طب هعمل إيه لو سقطت.. طيب هانجح ولا هعيد مش عارف.. ملزمتي في إيدي ومش شايف.. أصل المذاكرة بتتعبني.. وانا طبعا على صحتى خايف.. دى دموعى مفارقتش عنيا.. مرعوب انا من المادة الجاية.. وعندى صداع هيموتني.. أكيد في حد داعي عليا".
بينما عرّفت سمر سليم، الطالب!! وقالت.. هو كائن نصف حي.. شبه ميت.. مطحون دراسيا.. مخنوق يوميا.. مقهور منهجيا.. ومن كتر الضغط أصبح غبيا.. وبعد النتيجة.. اتهبل رسميا.
بينما قال مسئول الصفحة، مهيمكش من حد حتى لو منجحتش... ولو أي حد قالك حاجة قول له.. زي ما قال الهضبة:
يهمك في إيه؟ أشيل ولا اعيد ده امتحان ملكش تحل فيه.. وهتحل إيه.. ده اللي بيذاكر أكيد بيبان عليه.. إيه اللى قدامي ده سؤال محلتوووووش.. مبقتش اخاف عليه أسيبه أو امسحه.. فاشلين كتير اتفصلوا عادى مكملوش.. واهو كل واحد بيحلّ إللى ينجحه ولا تزعل نفسك.
واتفرج على قناة Student cinema: أفلام الموسم:
1- بكرة امتحان (رعب)، إمتى الإجازة (تشويق)، هاجيب امتياز (خيال علمي)، طالع بمواد (دراما)، سقطت (وثائقي)، أبويا شدّني (أكشن)، امتحانات حصري.. للطالب العصري.
قال مسئول الصفحة إن:
قمة الهدوء: إنك تقرأ مادة مش فاهمها
وقمة الهبل: إنك تقلب صفحات الكتاب كلها
وقمة العبط: إنك تصدق... إنك فعلا بتذاكر
أما قمة التناحة: إنك تمتحن فيها...
وقمة الخيال: إنك تتوقع إنك ناجح
وقمة الدهشة: إنك تدخل تحل فى الامتحان
وقمة المفاجأة: إنك تنجح..
ولكن الحقيقة:إنك تصحى من النوم.
وقال محمد جمال "أنا مش سوبر مان.. أنا طالب غلبان.. مذاكر نص المادة وتلاقيني نسيتها كمان.. هتقول لي تعريف هرسملك في الورقة الرغيف.. واوعاك تقولي أهمية هكتبلك أغاني عاطفية.. وإياك تقولي مفهوم هسبلك اللجنة وأقوم".
وفي الوقت دا لازم تشرب (كوك زيرو) ويعنى إيه كوك زيرو؟
يعنى قبل الامتحان بيومين نلاقى تصريح من المجلس العسكرى بيقول
"نظرا للأحداث التى تمر بها البلاد
ومراعاة لمشاعر شبابنا المجتهد فقد قرر المجلس الأعلى للقوات المسلحة
1) إلغاء الامتحانات لهذا العام
2) جميع الطلبة ناجحين ومنقولين للصف التالي
وهذا مراعاة منّا لمشاعر أبنائنا
والله الموفق والمستعان.
وقال مسئول الصفحة "لما تطلب من حد يغششك في الامتحان وميرضاش.. تدعى عليه إزاى؟(أشوف فيك يوم.. والاقيك تعبان في إجابتك.. وبتشكي عشان أساعدك.. تشكيلي وانا أفضل اشمت، وافرح من قلبي فيك.. سؤالك تاني مش هيفيدك.. محدش ضربك على إيدك.. عشان تنسى غش زمان.. وهنجح ومش قلقان.. هتيجى وتكون عشمان.. هتسقط ولسة كماااان".
رجع طالب من المدرسة وهو فرحان وبينادى.. ماما.. ماما أخدت عشر درجات
قالت وهى فرحانة.. انت ممتاز وأخدتها في أي مادة؟
رد الولد :في الحساب 2، 4 في الإملاء، 3 في العلوم، ودرجة واحدة في التاريخ.
المصدر
